യു.എ.ഇ. യുടെ ആദ്യ ചാന്ദ്രദൗത്യം, കൗണ്ട്ഡൗൺ തുടങ്ങി
November 21, 2022
യു.എ.ഇ. യുടെ ചന്ദ്രനിലേക്കുള്ള ആദ്യ ദൗത്യത്തിന്റെ വിക്ഷേപണത്തിനുള്ള കൗണ്ട്ഡൗൺ തുടങ്ങി. ജാപ്പനീസ് ചാന്ദ്ര പര്യവേക്ഷണ കമ്പനിയായ ഐസ്പേസിന്റെ ഹകുട്ടോ-ആർ മിഷൻ 1 ലാൻഡറിലാണ് യു.എ.ഇ.യുടെ റാഷിദ് റോവർ ചന്ദ്രോപരിതലത്തിൽ എത്തിക്കുക. ഈ മാസം 28-ന് ഉച്ചയ്ക്ക് യു.എ.ഇ. സമയം 12.46-ന് ഫ്ളോറിഡയിലെ കേപ് കനാവറലിലുള്ള സ്പേസ് ലോഞ്ച് കോംപ്ലക്സ് 40 വിക്ഷേപണ സൈറ്റിൽനിന്ന് സ്പേസ് എക്സ് ഫാൽക്കൺ 9 റോക്കറ്റിൽ റാഷിദ് റോവർ ചരിത്ര ദൗത്യത്തിനായി കുതിക്കും.10 കിലോ ഭാരമുള്ള ഈ റാഷിദ് റോവർ ദുബായിലെ മുഹമ്മദ് ബിൻ റാഷിദ് സ്പേസ് സെന്ററിൽ യു.എ.ഇ. ശാസ്ത്രജ്ഞരുടെ സംഘമാണ് നിർമിച്ചത്. നാലുചക്രങ്ങളുള്ള റോവർ ചന്ദ്രന്റെ ഭൂമിശാസ്ത്രവും ചന്ദ്രന്റെ പൊടിപടലങ്ങളുടെ സ്വഭാവവും പഠിക്കാൻ ചന്ദ്രന്റെ ഉപരിതലത്തിൽ ഒരു ചാന്ദ്രദിവസം ചെലവഴിക്കും. 14 ഭൗമ ദിനങ്ങൾക്ക് തുല്യമാണിത്. ദൗത്യത്തിന് പിന്നിൽ പ്രവർത്തിക്കുന്ന യു.എ.ഇ. എൻജിനിയർമാർ നേരത്തേ ഫ്ളോറിഡയിൽ എത്തിയിരുന്നു. വിക്ഷേപണത്തിനുള്ള അവസാന തയ്യാറെടുപ്പുകൾക്ക് നേതൃത്വം നൽകുകയാണ് യു.എ.ഇ. ശാസ്ത്രസംഘം. വിക്ഷേപണ ദിവസം ഫാൽക്കൺ 9 റോക്കറ്റ് ലാൻഡറിനെ ബഹിരാകാശത്ത് ഭ്രമണപഥത്തിലേക്ക് കൊണ്ടുപോകും. അവിടെനിന്ന് ചന്ദ്രനിലേക്ക് തനിച്ചായിരിക്കും റാഷിദ് റോവറിന്റെ യാത്ര. ഏപ്രിൽ അവസാനത്തോടെ ലാൻഡർ ചന്ദ്രനിലെത്തുമെന്നാണ് പ്രതീക്ഷിക്കുന്നത്.
No Comments
Leave a Comment