ആഗോള സർക്കാർ ഉച്ചകോടി : ഖത്തർ അമീറിന് യു.എ.ഇ.യുടെ ക്ഷണം
February 2, 2024
ആഗോള സർക്കാർ ഉച്ചകോടിയിൽ പങ്കെടുക്കാൻ ഖത്തർ അമീർ ശൈഖ് തമീം ബിൻ ഹമദ് അൽതാനിക്ക് യു.എ.ഇ. യുടെ ക്ഷണം. യു.എ.ഇ. പ്രസിഡന്റ് ശൈഖ് മുഹമ്മദ് ബിൻ സായിദ് അൽ നഹ്യാന്റെ ക്ഷണക്കത്ത് ഖത്തറിലെ യു.എ.ഇ. സ്ഥാനപതി ശൈഖ് സായിദ് ബിൻ ഖലീഫ അൽ നഹ്യാനാണ് ഖത്തർ അമീറിന് കൈമാറിയത്. അമീരി ദിവാനിലായിരുന്നു കൂടിക്കാഴ്ച.അടുത്തമാസം 12 മുതൽ 14 വരെ ദുബായ് മദീനത്ത് ജുമൈറയിലാണ് വേൾഡ് ഗവൺമെന്റ് സമ്മിറ്റ് നടക്കുക. 150-ലേറെ രാജ്യങ്ങളിൽനിന്നുള്ള ഒട്ടേറെ വിദഗ്ധരും മുതിർന്ന ഉദ്യോഗസ്ഥരും പങ്കെടുക്കും. ഭാവി സർക്കാരുകളെ രൂപപ്പെടുത്തുകയും വെല്ലുവിളികൾക്കുള്ള നൂതന പരിഹാരങ്ങൾ തിരിച്ചറിയുകയുമാണ് ഇത്തവണത്തെ ഉച്ചകോടിയുടെ ലക്ഷ്യം. നിർമിതബുദ്ധി, സർക്കാർ സേവനങ്ങൾ, നഗരവത്കരണം, വിദ്യാഭ്യാസം, സ്മാർട്ട് മൊബിലിറ്റി എന്നിവയുമായി ബന്ധപ്പെട്ടുള്ള കോൺഫറൻസുകൾ ഉച്ചകോടിയിലുണ്ടാകും. യു.എൻ, ലോകബാങ്ക്, ഐ.എം.എഫ്., ലോകാരോഗ്യ സംഘടന, അന്താരാഷ്ട്ര ആണവോർജ ഏജൻസി എന്നിവയുൾപ്പെടെ 80-ലേറെ പ്രാദേശിക, അന്താരാഷ്ട്ര സർക്കാർ സ്ഥാപനങ്ങളിൽനിന്നുള്ള 200 പ്രഭാഷകരെത്തും.നൂതന ആശയങ്ങളുടെ വിജ്ഞാനവേദിയായിരിക്കും ഉച്ചകോടിയെന്ന് ഉച്ചകോടിയുടെ ചെയർമാനും കാബിനറ്റ്കാര്യ മന്ത്രിയുമായ മുഹമ്മദ് അൽ ഗെർഗാവി നേരത്തെ വ്യക്തമാക്കിയിരുന്നു. എട്ട് നൊബേൽ സമ്മാന ജേതാക്കളെത്തും. പങ്കെടുക്കുന്ന ലോകനേതാക്കളുടെ പേരുകൾ വരുംദിവസങ്ങളിൽ പ്രഖ്യാപിക്കും. അടുത്ത 1000 വർഷങ്ങൾക്കുള്ളിൽ നിർമിതബുദ്ധി ലോകത്തെയാകെ മാറ്റും. ഇതുവഴി ഒട്ടേറെ പ്രശ്നങ്ങൾ പരിഹരിക്കപ്പെടും. യു.എ.ഇ. നിർമിതബുദ്ധിയുടെ പ്രാരംഭഘട്ടത്തിലാണ്. ദൈനംദിന ജീവിതത്തെവരെ നിർമിതബുദ്ധി സ്വാധീനിക്കുന്നതിനാൽ എ.ഐ. അധിഷ്ഠിത ഉച്ചകോടിയായിരിക്കുമിതെന്ന് അൽ ഗെർഗാവി അറിയിച്ചു.
No Comments
Leave a Comment
