ഫുഡ് ബാങ്ക് അന്നമെത്തിച്ചത് 1.86കോടി പേർക്ക്
January 26, 2024
ദുബൈയിൽ നിരാലംബരായവർക്ക് അന്നമെത്തിക്കുന്ന യു.എ.ഇ ഫുഡ് ബാങ്ക് പദ്ധതി കഴിഞ്ഞ വർഷം ലോകത്താകമാനം ഉപകാരപ്പെട്ടത് 1.86 കോടി പേർക്ക്. പദ്ധതിയുടെ വാർഷിക റിപ്പോർട്ടിലാണ് ഇക്കാര്യം ചൂണ്ടിക്കാണിക്കുന്നത്. മുഹമ്മദ് ബിൻ റാശിദ് ആൽ മക്തൂം ഗ്ലോബൽ ഇനീഷ്യേറ്റിവിന് കീഴിൽ രൂപംനൽകിയ സംവിധാനത്തിന് 2023ൽ 800 സ്ഥാപനങ്ങളുടെ പിന്തുണ ലഭിച്ചിട്ടുണ്ട്. ഭക്ഷണം പാഴാകുന്നത് കുറച്ചുകൊണ്ട്, കൂടുതലായി വരുന്നത് ദരിദ്രർക്ക് എത്തിച്ചുനൽകുകയെന്ന ലക്ഷ്യത്തോടെയാണ് പദ്ധതിക്ക് തുടക്കം കുറിച്ചത്.പ്രാദേശികവും അന്താരാഷ്ട്ര തലത്തിലുള്ളതുമായ ജീവകാരുണ്യ സ്ഥാപനങ്ങൾ ഫുഡ് ബാങ്കുമായി യോജിച്ച് പ്രവർത്തിക്കുന്നുണ്ട്. ഭക്ഷണവിതരണത്തിന് പുറമെ, ബോധവത്കരണ കാമ്പയിനുകളും സംവിധാനത്തിനു കീഴിൽ സംഘടിപ്പിച്ചിട്ടുണ്ട്. ഇതിൽ 1,800 വളന്റിയർമാർ പങ്കെടുത്തു. ഏകദേശം 1.47 കോടി ദിർഹം ഫണ്ടാണ് ഫുഡ് ബാങ്കിന് വിവിധ ഭാഗങ്ങളിൽനിന്ന് ലഭിച്ചത്. ഭക്ഷണം പാഴാക്കുന്നത് ഒഴിവാക്കുന്നത് വഴി 6,000 ടൺ ഭക്ഷ്യമാലിന്യങ്ങൾ ഭൂമിയിൽ നിക്ഷേപിക്കുന്നത് ഒഴിവാക്കാൻ സംരംഭത്തിന് സാധിച്ചിട്ടുണ്ട്.
No Comments
Leave a Comment
