സൈബർ തട്ടിപ്പുകാരെ പിടിക്കാൻ ദുബൈ പൊലീസ്, ‘വിസ’ സഹകരണം
January 24, 2024
സാമ്പത്തിക തട്ടിപ്പുകളും കുറ്റകൃത്യങ്ങളും തടയുന്നതിന് ആഗോള ഡിജിറ്റൽ പേമെന്റ് സംവിധാനമായ ‘വിസ’യുമായി കൈകോർത്ത് ദുബൈ പൊലീസ്. തട്ടിപ്പുകൾ പിടികൂടുന്നതിനും തടയുന്നതിനും യോജിച്ചുനീങ്ങുന്നതിന് പൊലീസുമായി സഹകരണ ധാരണപത്രം ഒപ്പുവെച്ചു. ഇരുസ്ഥാപനങ്ങളുടെ ദീർഘകാലത്തെ ബന്ധം ശക്തിപ്പെടുത്തുന്നതു കൂടിയാണ് കരാർ.കരാറനുസരിച്ച് ദുബൈ പൊലീസ് ആസ്ഥാനത്ത് പ്രവർത്തിക്കുന്ന ഓപറേഷൻ സെന്റർ ഫോർ ഇക്കണോമിക് ക്രൈംസ് എന്ന സംവിധാനവുമായി ‘വിസ’ സഹകരിക്കും. സാമ്പത്തിക തട്ടിപ്പുകളിൽനിന്ന് താമസക്കാരെയും ബിസിനസുകളെയും സംരക്ഷിക്കുന്നതിന് ഏറ്റവും നൂതന സംവിധാനങ്ങൾ രൂപപ്പെടുത്തി പ്രവർത്തിക്കുന്ന സംരംഭമാണ് ഓപറേഷൻ സെന്റർ ഫോർ ഇക്കണോമിക് ക്രൈംസ്.സാമ്പത്തിക കുറ്റകൃത്യങ്ങൾ സംബന്ധിച്ച് വിവരങ്ങൾ പരസ്പരം കൈമാറാനും തട്ടിപ്പുകൾ തടയുന്നതിന് യോജിച്ച് പ്രവർത്തിക്കാനും സഹായിക്കുന്നതാണ് കരാറെന്ന് ലഫ്. ജനറൽ അബ്ദുല്ല ഖലീഫ അൽ മർറി പറഞ്ഞു. സാമ്പത്തിക തട്ടിപ്പുകൾ തടയുന്നതിന് ദുബൈ പ്രത്യേക ശ്രദ്ധയാണ് നൽകുന്നതെന്നും ഇത്തരം കുറ്റകൃത്യങ്ങൾ തടയുന്നതിൽ ലോകത്തിന് മാതൃകയാകാൻ എമിറേറ്റിന് സാധിച്ചിട്ടുണ്ടെന്നും അദ്ദേഹം കൂട്ടിച്ചേർത്തു.
No Comments
Leave a Comment