യു എ ഇയിൽ കെട്ടിടങ്ങൾക്ക് 2024 മുതൽ ഹസൻതുക് നിർബന്ധം
June 10, 2022
അഗ്നിബാധയിൽ നിന്നു കെട്ടിടങ്ങൾക്കു സംരക്ഷണം നൽകുന്ന ഹസൻതുക് സ്മാർട് സംവിധാനം 2024 മുതൽ രാജ്യത്തു നിർബന്ധം. പാർപ്പിട, വാണിജ്യ- വ്യാപാര കേന്ദ്രങ്ങളെല്ലാം ഇതിന്റെ പരിധിയിലാക്കും.തീപിടിത്ത സൂചന ലഭിക്കുമ്പോഴേക്കും സിവിൽ ഡിഫൻസിൽ മുന്നറിയിപ്പെത്തും. ഇത്തിസലാത്തുമായി സഹകരിച്ചാണിത്. അത്യാഹിത ഘട്ടങ്ങളിൽ അധികൃതരെ ഫോണിൽ ബന്ധപ്പെടാതെ തന്നെ 2 മിനിറ്റിനകം സേവനം ലഭിക്കും. അപകടമുണ്ടായ സ്ഥലം, അപകട വ്യാപ്തി, എത്താനുള്ള എളുപ്പവഴി എന്നിവ കൃത്യമായി നിർണയിക്കാനും അടുത്തുള്ള സിവിൽ ഡിഫൻസ് കേന്ദ്രങ്ങളുടെ സേവനം ഏകോപിപ്പിക്കാനും കഴിയും.2018 ലാണ് പദ്ധതി ആവിഷ്കരിച്ചത്. അബുദാബിയിലെ 18,000 വീടുകളിൽ സംവിധാനം നടപ്പാക്കിയതായി സിവിൽ ഡിഫൻസ് ഹെഡ് ക്വാർട്ടേഴ്സ് പ്രതിരോധ സുരക്ഷാ വകുപ്പ് മേധാവി കേണൽ അഹമ്മദ് ജാസിം അൽ മൻസൂരി പറഞ്ഞു. 2021 ജനുവരി 3 മുതൽ നിർമാണത്തിലിരിക്കുന്ന കെട്ടിടങ്ങൾക്കും ഇതു നിർബന്ധമാക്കി. കെട്ടിട നിർമാണത്തിന് അനുമതി കിട്ടാൻ ഇതാവശ്യമാണ്.
No Comments
Leave a Comment
