ഇന്ത്യക്കാർക്ക് ഏറ്റവും ഇഷ്ടമുള്ള ഇടം ദുബായ്
August 18, 2022
ലോകത്ത് മലയാളികളടക്കമുള്ള ഇന്ത്യക്കാർ ഏറ്റവും കൂടുതൽ യാത്ര ചെയ്യാൻ ആഗ്രഹിക്കുന്ന നഗരം’ ദുബായെന്ന് സർവ്വേ റിപ്പോർട്ട്. . ഈ വർഷം ആദ്യ പകുതി 40 ലക്ഷം ഇന്ത്യക്കാരെത്തി. മുംബൈ, ഡൽഹി, ഹൈദരാബാദ് എന്നിവിടങ്ങളിൽ നിന്നാണ് ഏറ്റവും കൂടുതൽ യാത്രക്കാർ. രണ്ടാം സ്ഥാനത്തുള്ള സൗദിയിൽ നിന്ന് 20 ലക്ഷം പേരും മൂന്നാമതുള്ള യുകെയിൽ നിന്ന് 19 ലക്ഷം പേരുമെത്തി. കഴിഞ്ഞവർഷം ആദ്യ പകുതി 25.2 ലക്ഷം സന്ദർശകർ ദുബായിലെത്തിയെങ്കിൽ ഈ വർഷം ഇതേ കാലയളവിൽ 71.2 ലക്ഷമായി. അതായത് മൊത്തം വിദേശ സന്ദർശകരുടെ എണ്ണത്തിൽ മൂന്നിരട്ടിയോളം വർധന. മേയ് 9 മുതൽ 45 ദിവസം നവീകരണ ജോലികൾക്ക് റൺവേ ഭാഗികമായി അടച്ചിടേണ്ടി വന്നിട്ടും സന്ദർശകർ കുറഞ്ഞില്ല. ദുബായ് വിമാനത്താവളത്തിൽ ഈ വർഷം 6.24 കോടി യാത്രക്കാർ എത്തുമെന്നു പ്രതീക്ഷിക്കുന്നതായി ദുബായ് എയർപോർട്സ് ചീഫ് എക്സിക്യൂട്ടീവ് പോൾ ഗ്രിഫിത്സ് പറഞ്ഞു. കോവിഡ് നിയന്ത്രണങ്ങൾ നീക്കിയശേഷം യാത്രക്കാരുടെ എണ്ണത്തിൽ വൻ വർധനയുണ്ട്. ദുബായ് വഴി യാത്ര ചെയ്യുന്ന ട്രാൻസിറ്റ് യാത്രക്കാരുടെ എണ്ണവും കൂടി. വിമാനസർവീസുകൾ പൂർണതോതിൽ പുനരാരംഭിച്ചതോടെ വ്യോമമേഖല കോവിഡിനു മുൻപുള്ള നേട്ടങ്ങളിലേക്കു മടങ്ങിയെത്തി. വീസ ഇളവുകളിലൂടെ ടൂറിസം മേഖലയുടെ സമഗ്രവികസനം യുഎഇ ലക്ഷ്യമിടുന്നു. ഒന്നിലേറെ തവണ പോയിവരാവുന്ന 5 വർഷ വീസയടക്കമുള്ള ടൂറിസ്റ്റ് വീസ സന്ദർശകരെ ആകർഷിക്കുന്നു. എക്സ്പോയുടെ വൻവിജയവും ടൂറിസം മേഖലയ്ക്കു നേട്ടമായി.ക്രൂസ് ടൂറിസം മേഖലയും സജീവമാണ്.സാധാരണ ടൂറിസ്റ്റ് വീസയിൽ എത്തുന്നവർക്ക് 90 ദിവസം വരെ രാജ്യത്തു തങ്ങാനും അത്രയും ദിവസവും കൂടി പുതുക്കാനും കഴിയും. ഒരുവർഷം 180 ദിവസത്തിൽ കൂടരുത്. അപേക്ഷകന്റെ ബാങ്ക് അക്കൗണ്ടിൽ 6 മാസമായി 4,000 ഡോളറോ തത്തുല്യ തുകയോ ഉണ്ടാകണമെന്നാണു വ്യവസ്ഥ. ബിസിനസ് ടൂറിസത്തിലും ക്രമാനുഗത വളർച്ചയുണ്ട്. യുഎഇയിൽ സന്ദർശനം നടത്തുന്നതിനൊപ്പം സാധ്യതകൾ വിലയിരുത്തി സംരംഭങ്ങൾക്ക് തുടക്കം കുറിക്കാം. വെർച്വൽ ഓഫിസ് തുടങ്ങാമെന്നതിനാൽ സംരംഭകർ സ്ഥിരമായി യുഎഇയിൽ തങ്ങേണ്ടതില്ല.
No Comments
Leave a Comment
