ഊർജമേഖലയിൽ യുവപ്രതിഭകൾക്കായി ‘ക്ലീൻ ടെക്ക് യൂത്ത്’പദ്ധതി
August 5, 2022
യു.എ.ഇ.യിലെ വിവിധ മേഖലകളിൽ നിന്നുള്ള യുവപ്രതിഭകളെ ഉൾപ്പെടുത്തി ദുബായ് ഇലക്ട്രിസിറ്റി ആൻഡ് വാട്ടർ അതോറിറ്റി (ദേവ) നടപ്പാക്കുന്ന ‘ക്ലീൻ ടെക്ക് യൂത്ത്’ പദ്ധതിയുടെ രണ്ടാമത്തെ ബാച്ച് ദേവ ഇന്നൊവേഷൻ കേന്ദ്രത്തിൽ ആരംഭിച്ചു. ശുദ്ധവും പുനരുപയോഗ്യവുമായ ഊർജത്തെക്കുറിച്ചും ഈ മേഖലയിലെ സംരംഭത്വത്തെ ക്കുറിച്ചുമുള്ള യുവപ്രതിഭകളുടെ വൈദഗ്ധ്യവും അറിവും വികസിപ്പിക്കുകയാണ് പരിപാടിയുടെ പ്രധാന ലക്ഷ്യം.യു.എ.ഇ.യിലെ 13 അംഗീകൃത വിദ്യാഭ്യാസ സ്ഥാപനങ്ങളിൽനിന്നുള്ള 25 യുവപ്രതിഭകൾ രാജ്യത്തിന്റെ ഊർജമേഖലയ്ക്ക് മുതൽക്കൂട്ടാകുന്നതാണ് ദേവയുടെ നേതൃത്വത്തിൽ നടന്ന പരിപാടിയിലെ പങ്കാളിത്തം തെളിയിക്കുന്നത്. അപേക്ഷകരായ 145 പേരിൽനിന്നുമാണ് ബിരുദധാരികളായ 25 പേരെ തിരഞ്ഞെടുത്തത്. സ്കൂളുകൾ, സർവകലാശാലകൾ, സംഘടനകൾ, വിവിധ മേഖലയിലെ വിദഗ്ധർ തുടങ്ങിയവരുടെ പങ്കാളിത്തത്തോടെ ശില്പശാലകളും സ്ഥലസന്ദർശനങ്ങളും ഒട്ടേറെ സെമിനാറുകളും ക്ലീൻ ടെക്ക് യൂത്ത് പദ്ധതിയുടെ ഭാഗമായി നടക്കുന്നു.
ശുദ്ധപുനരുപയോഗ ഊർജമേഖലയുടെ വികസനത്തെപ്പറ്റി ചർച്ചചെയ്യാനും അവ പ്രാബല്യത്തിലാക്കാനും പദ്ധതി നിർണായകമാകുമെന്നാണ് പ്രതീക്ഷിക്കുന്നത്.. ദേശീയ വികസന ലക്ഷ്യങ്ങളിൽ യുവജനങ്ങളുടെ പങ്കാളിത്തം ഉറപ്പാക്കുന്നതിനും ശുദ്ധപുനരുപയോഗ ഊർജമേഖലകളിൽ യോഗ്യതയുള്ള തൊഴിലാളികളുടെയും വിദഗ്ധരുടെയും സേവനം ഉറപ്പാക്കാനും ദേവ മുൻഗണന നൽകുമെന്നും ദേവ സി.ഇ.ഒ. സയീദ് മുഹമ്മദ് അൽ തായർ വ്യക്തമാക്കി.ദുബായിയുടെ ക്ലീൻ എനർജി സ്ട്രാറ്റജി-2050, ദുബായ് നെറ്റ് സീറോ കാർബൺ എമിഷൻസ് സ്ട്രാറ്റജി 2050 എന്നിവയ്ക്ക് അനുസൃതമായി ശുദ്ധ പുനരുപയോഗ ഊർജ ഉത്പാദനം വർധിപ്പിക്കാനുള്ള ശ്രമങ്ങൾ നടത്തുന്നുണ്ട്. 2050 ആകുന്നതോടെ ശുദ്ധ ഊർജസ്രോതസ്സുകളിൽനിന്നുള്ള ദുബായുടെ ഊർജ ഉത്പാദനശേഷി 100 ശതമാനം ആകുമെന്നാണ് പ്രതീക്ഷിക്കുന്നത്.ശുദ്ധ ഊർജപദ്ധതികൾ വികസിപ്പിക്കുന്നതിന് ആവശ്യമായ അറിവും സാങ്കേതികവിദ്യകളും യുവപ്രതിഭകൾക്കായി ലഭ്യമാക്കും.
No Comments
Leave a Comment