ഹോട്ടലുകളുടെ സുവർണ നഗരമായി ദുബായ്.
June 29, 2022
വിനോദ സഞ്ചാരികളെസ്വാഗതം ചെയ്യാൻ ആകർഷകമായ പദ്ധതികൾ ഒരുക്കി ഹോട്ടലുകളുടെ സുവർണ നഗരമായി ദുബായ് മാറുന്നു. പ്രതിമാസം പുതിയ 1,027 ഹോട്ടൽ മുറികളാണു സന്ദർശകരെ സ്വീകരിക്കാനായി സജ്ജമാകുന്നത്. ദുബായ് എക്കണോമി ആൻഡ് ടൂറിസം ഡിപ്പാർട്ട്മെന്റാണു വിനോദ സഞ്ചാര മേഖലയിലെ പ്രധാന കണ്ണിയായി ഹോട്ടൽ രംഗത്തും അനുബന്ധമായുമുള്ള ദുബായ് നഗരത്തിന്റെ കുതിപ്പ് വ്യക്തമാക്കിയത്. 2021 ഏപ്രിൽ മുതൽ 2022 ഏപ്രിൽ വരെ പുതിയ 12,324 ഹോട്ടൽ മുറികൾ ഒരുങ്ങി. 2022 ഏപ്രിൽ അവസാനമായപ്പോഴേക്കും 1.40 ലക്ഷത്തിലധികം ഹോട്ടൽ മുറികളായി. കഴിഞ്ഞ വർഷം ഇതേ കാലയളവിൽ ഇതു 1.28 ലക്ഷമായിരുന്നു. പ്രതിവർഷം ഹോട്ടൽ രംഗത്തുണ്ടായ പുരോഗതി 9.6 ശതമാനമാണ്. പുതിയ 55 ഹോട്ടലുകളും ഇക്കാലയളവിൽ ദുബായിൽ തുറന്നു. 2021 ൽ 714 ആയിരുന്നു ഹോട്ടലുകളെങ്കിൽ 2022 ഏപ്രിലിൽ 769 ആയി ഉയർന്നു.ഓരോ മാസവും 4.5 ശതമാനാണു ഹോട്ടലുകളുടെ വർധന. ദുബായ് എമിറേറ്റിൽ ആഡംബര ഹോട്ടലുകളും പെരുകി. മൊത്തം ഹോട്ടലുകളിൽ 34 ശതമാനവും പഞ്ചനക്ഷത്രങ്ങളാണ്. 146 സ്ഥാപനങ്ങൾ പഞ്ചനക്ഷത്ര പദവിയിലെത്തിയതായി അധികൃതർ വെളിപ്പെടുത്തി, ഓരോ വരവിലും സന്ദർശകർക്കു നവ്യാനുഭവം പകരുന്ന പുരോഗതിയാണു ദുബായ് സന്ദർശകർക്കു സമ്മാനിക്കുന്നത്. വിനോദ മേഖലയിൽ പുതിയ ഉല്ലാസ കേന്ദ്രങ്ങൾ തുറന്നാണു വിനോദ സഞ്ചാരികളെ മാടി വിളിക്കുന്നത്.’ഐൻ ദുബായ്’, ഡീപ് ഡൈവ് ദുബായ്, ഹത്ത ഡോം പാർക്ക്, പാം ജുമൈരയിലെ ‘ദ് വ്യൂ അറ്റ് ദ് പാം’ എന്നിവ ചില ഉദാഹരണങ്ങൾ മാത്രമാണ്. കരയിലും കടലിലും ആകാശത്തുമെല്ലാം അവിസ്മരണീയ ഉല്ലാസ സംവിധാന ഒരുക്കിയതിനാൽ അനുദിനം ജനപ്രിയ നഗരമായി മാറുകയാണു ദുബായ്.
No Comments
Leave a Comment