യു എഇയിൽ ഭക്ഷണം പാഴാക്കൽ തടയാൻ നിഅ്മ പദ്ധതി; ഭക്ഷണം അനുഗ്രഹം, വിശക്കുന്നവർക്ക് എത്തിക്കാം: മന്ത്രി
June 9, 2022
ഭക്ഷണം പാഴാക്കുന്നത് തടയാനും മാലിന്യം കുറയ്ക്കാനും പുതിയ പദ്ധതിക്ക് (നിഅ്മ) യുഎഇ തുടക്കം കുറിച്ചു. രാജ്യത്ത് ഒരുവർഷം 600 കോടി ദിർഹത്തിന്റെ ഭക്ഷണം പാഴാക്കുന്നുണ്ടെന്ന് കണ്ടെത്തിയതിനെ തുടർന്നാണ് നടപടിയെന്ന് മന്ത്രി മർയം അൽ മെഹൈരി പറഞ്ഞു.സർക്കാർ, സ്വകാര്യ മേഖലകൾ, എൻജിഒകൾ, പൊതുജനങ്ങൾ എന്നിവയുടെ സഹകരണത്തോടെ പദ്ധതി നടപ്പാക്കും. എമിറേറ്റ്സ് ഫൗണ്ടേഷൻ അബുദാബിയിൽ സംഘടിപ്പിച്ച പരിപാടിയിൽ സംസാരിക്കുകയായിരുന്നു അവർ. ലോകത്ത് ഏറ്റവും കൂടുതൽ ഭക്ഷണം പാഴാക്കുന്ന രാജ്യങ്ങളിലൊന്നാണ് യുഎഇ. നിഅ്മ എന്നാൽ അനുഗ്രഹം എന്നാണർഥം. യുഎൻ റിപ്പോർട്ടനുസരിച്ച് ലോകത്ത് 80 കോടി ജനങ്ങൾ പട്ടിണിയിലാണ്.ഇതേസമയം വർഷത്തിൽ ഉൽപാദിപ്പിക്കുന്ന ഭക്ഷ്യോൽപന്നങ്ങളിൽ 30%അതായത് 13 ലക്ഷം ടൺ ഉൽപന്നങ്ങൾ പാഴാകുന്നുണ്ട്. ഈ പശ്ചാത്തലത്തിൽ ഭക്ഷണം പാഴാകുന്നത് തടയാൻ ശക്തമായ നടപടി ആവശ്യമാണെന്നും പറഞ്ഞു. നിർമാതാക്കൾ, ഉപഭോക്താക്കൾ, ഹോട്ടൽ, റസ്റ്ററന്റ്, വീട് എന്നിവിടങ്ങളിലെല്ലാം സൂക്ഷ്മത അനിവാര്യം. 60% ഭക്ഷണവും പാഴാക്കുന്നത് വീടുകളിലാണ്.25% ഹോട്ടൽ വ്യവസായ മേഖലകളിലും 15% ചില്ലറ കേന്ദ്രങ്ങളിലുമാണ് പാഴാകുന്നത്. ഇതൊഴിവാക്കാൻ ഓരോരുത്തരും മനസ്സു വയ്ക്കണം. മിച്ചമുള്ള ഭക്ഷണം വൃത്തിയായി പായ്ക്ക് ചെയ്ത് സന്നദ്ധ പ്രവർത്തകർ വഴി ആവശ്യക്കാർക്ക് എത്തിക്കാമെന്നും മന്ത്രി പറഞ്ഞു
No Comments
Leave a Comment
