യുഎഇ ബഹിരാകാശ പദ്ധതികൾക്ക് 6525 കോടി രൂപ.വളരും, സ്വകാര്യ സംരംഭങ്ങൾ; ഒരുങ്ങും, അവസരങ്ങൾ
July 18, 2022
അവ്യക്ത ദൃശ്യങ്ങൾ പോലും അതിസൂക്ഷ്മമായി പകർത്തി സമഗ്ര വിവരശേഖരം തയാറാക്കാനാകുന്ന ഉപഗ്രഹങ്ങൾ വികസിപ്പിക്കാനും ഭാവി ദൗത്യങ്ങൾ വേഗത്തിലാക്കാനും യുഎഇയുടെ വൻ പദ്ധതി. ഇതിനായി 300 കോടി ദിർഹത്തിന്റെ (6525 കോടിയിലേറെ രൂപ) ദേശീയ ഫണ്ടിന് യുഎഇ സ്പേസ് ഏജൻസി രൂപം നൽകി.3 വർഷത്തിനകം ആദ്യ ഉപഗ്രഹം വിക്ഷേപിക്കും.കാലാവസ്ഥാ മാറ്റങ്ങൾ നിർണയിക്കുന്നതിനു പുറമേ ചൊവ്വ, ശുക്രൻ എന്നീ ഗ്രഹങ്ങളുടെ പഠനം കൂടി ലക്ഷ്യമിട്ടാണ് സുപ്രധാന തീരുമാനം. റഡാർ സാങ്കേതിക സംവിധാനങ്ങളോടു കൂടിയ നൂതന റിമോട് സെൻസിങ് സാറ്റലൈറ്റ് പദ്ധതിക്കാണ് ആദ്യഘട്ടത്തിൽ തുടക്കമാകുന്നത്.കടൽ വിഭവങ്ങൾ, എണ്ണ നിക്ഷേപം, സസ്യസമ്പത്ത്, തുടങ്ങിയവയെക്കുറിച്ചു കൂടുതൽ വിവരങ്ങൾ ലഭ്യമാകാനും അതിർത്തി നിരീക്ഷണത്തിനുമുള്ള ഉപഗ്രഹങ്ങൾ വികസിപ്പിക്കും. ഒട്ടേറെ തൊഴിലവസരങ്ങൾ സൃഷ്ടിക്കാനും രാജ്യത്തിന്റെ സാമ്പത്തിക മുന്നേറ്റത്തിനും പദ്ധതി സഹായകമാകും. രാജ്യാന്തര കമ്പനികൾക്കും ഇതിന്റെ നേട്ടമുണ്ടാകും.
സ്വകാര്യമേഖലയുടെ പങ്കാളിത്തത്തോടെ ബഹിരാകാശ പദ്ധതികൾ ഊർജിതമാക്കാൻ അബുദാബി, ദുബായ്, ഷാർജ എന്നിവിടങ്ങളിൽ പ്രത്യേക സാമ്പത്തിക മേഖലകൾ വൈകാതെ സജ്ജമാകും. റോക്കറ്റുകളുടെയും പേടകങ്ങളുടെയും മറ്റും ഘടകങ്ങൾ നിർമിക്കുന്ന സ്റ്റാർട് അപ്പുകൾ ഉൾപ്പെടെയുള്ള സംരംഭങ്ങൾക്ക് ‘സ്പേസ് സോണിൽ’ അവസരങ്ങളൊരുക്കും.
No Comments
Leave a Comment