പ്രതിരോധ കുത്തിവെപ്പ് ബോധവത്കരണം
September 21, 2022
യു.എ.ഇ.യിൽ പനിയെ നേരിടാനുള്ള പ്രതിരോധകുത്തിവെപ്പ് സ്വീകരിക്കാൻ ആരോഗ്യ, രോഗപ്രതിരോധ മന്ത്രാലയം ബോധവത്കരണം നടത്തുന്നു. ‘സ്വയം സംരക്ഷിക്കൂ, സമൂഹത്തെ സുരക്ഷിതമാക്കൂ’ എന്ന പ്രമേയത്തിൽ ആരംഭിക്കുന്ന ബോധവത്കരണ പ്രചാരണ പരിപാടികൾക്ക് ഞായറാഴ്ച തുടക്കമാകും.അബുദാബി സെന്റർ ഫോർ പബ്ലിക് ഹെൽത്ത്, ദുബായ് ഹെൽത്ത് അതോറിറ്റി, ഡിപ്പാർട്ട്‌മെന്റ് ഓഫ് ഹെൽത്ത്-അബുദാബി എന്നിവയുടെ സഹകരണത്തോടെ നടത്തുന്ന പ്രചാരണ പരിപാടികൾ ഡിസംബർ വരെ നീണ്ടു നിൽക്കും. ഫ്ളൂ വാക്സിനുകളുടെ പ്രാധാന്യത്തെക്കുറിച്ച് പൊതുജനങ്ങളിൽ അവബോധമുണ്ടാക്കുക, അന്താരാഷ്ട്ര രീതികളെക്കുറിച്ച് ആരോഗ്യപ്രവർത്തകരെ പരിശീലിപ്പിക്കുക എന്നിവയാണ് ഇതിലൂടെ ലക്ഷ്യമിടുന്നത്. മുതിർന്നവർ, ഗർഭിണികൾ, മാറാവ്യാധികളുള്ളവർ തുടങ്ങി ഇൻഫ്‌ളുവൻസ സങ്കീർണതകൾക്ക് ഉയർന്ന സാധ്യതയുള്ളവരിൽ ബോധവത്കരണ പ്രചാരണം കൂടുതൽ ശ്രദ്ധ കേന്ദ്രീകരിക്കും. പകർച്ചവ്യാധികൾക്കെതിരേ പ്രതിരോധിക്കാൻ സമൂഹത്തെ പ്രാപ്തരാക്കാനുള്ള മന്ത്രാലയത്തിന്റെ പ്രതിജ്ഞാബദ്ധതയാണ് വാർഷിക ബോധവത്കരണ പ്രചാരണ പരിപാടികളിലൂടെ പ്രതിഫലിക്കുന്നതെന്ന് പൊതുജനാരോഗ്യ മേഖല അസിസ്റ്റന്റ് അണ്ടർ സെക്രട്ടറി ഡോ.ഹുസൈൻ അബ്ദുൾ റഹ്മാൻ അൽ റാൻഡ് അഭിപ്രായപ്പെട്ടു. ബോധവത്കരണത്തിലൂടെ അണുബാധാ വ്യാപനം കുറയ്ക്കാനും സാമൂഹിക അവബോധം ഉയർത്താനും സാധിക്കും. കൂടാതെ ആരോഗ്യപ്രവർത്തകരുടെ വൈദഗ്ധ്യം വികസിപ്പിക്കാനും ഗുണനിലവാരമുള്ള സമ്പ്രദായങ്ങൾ പരിചയപ്പെടുത്താനും അവസരം ലഭിക്കുമെന്നും അദ്ദേഹം പറഞ്ഞു.
No Comments
Leave a Comment
