ദേവ പ്രവർത്തനക്ഷമത വർധിപ്പിക്കുന്നത് തുടരും
July 27, 2022
പ്രതിദിനം വർധിച്ചുവരുന്ന ജല, വൈദ്യുതി ആവശ്യങ്ങൾ പരിഹരിക്കുന്നതായി പ്രവർത്തനക്ഷമത വർധിപ്പിക്കുന്നത് തുടരുമെന്ന് ദുബായ് ഇലക്ട്രിസിറ്റി ആൻഡ് വാട്ടർ അതോറിറ്റി (ദേവ)അറിയിച്ചു. വിശ്വാസ്യത, ലഭ്യത, പ്രവർത്തനകാര്യക്ഷമത, ഗുണനിലവാരം എന്നിവ കണക്കിലെടുത്ത് ഏറ്റവും ഉയർന്ന മാനദണ്ഡങ്ങൾക്ക് അനുസൃതമായാണ് ദേവ പ്രവർത്തിക്കുന്നത്.35 ലക്ഷത്തിലേറെ ദുബായ് നിവാസികൾക്ക് ദേവ മികവാർന്ന സേവനങ്ങൾ നൽകുന്നുണ്ട്. 2040-ഓടെ ഇത് 58 ലക്ഷമായി ഉയരുമെന്ന് പ്രതീക്ഷിക്കുന്നതായി ദേവ വ്യക്തമാക്കി. ദുബായിയുടെ ക്ളീൻ എനർജി സ്ട്രാറ്റജി 2050, ദുബായ് നെറ്റ് സീറോ കാർബൺ എമിഷൻസ് സ്ട്രാറ്റജി 2050 എന്നിവയ്ക്ക് അനുസൃതമായി ശുദ്ധ പുനരുപയോഗ ഊർജോത്പാദനം വർധിപ്പിക്കാനുള്ള ശ്രമങ്ങൾ നടത്തിവരുന്നുണ്ട്. 2050-ഓടെ ശുദ്ധ ഊർജസ്രോതസ്സുകളിൽനിന്ന് ദുബായുടെ ഊർജോത്പാദനശേഷി 100 ശതമാനം കൈവരിക്കാനാകുമെന്നാണ് പ്രതീക്ഷിക്കുന്നത്.ജല, വൈദ്യുതി ഉപയോഗ പ്രവചനങ്ങൾ അടിസ്ഥാനമാക്കി 2031-വരെയുള്ള അടിസ്ഥാനസൗകര്യ വിപുലീകരണപദ്ധതികൾ ഇതിനോടകം ആവിഷ്കരിച്ചിട്ടുണ്ടെന്ന് ദേവ സി.ഇ.ഒ. സയീദ് മുഹമ്മദ് അൽ തായർ പറഞ്ഞു. സുസ്ഥിരമായ ഭാവിക്ക് ദുബായ് നേതൃത്വത്തിന്റെ കാഴ്ചപ്പാടനുസരിച്ച് സാധ്യമായ എല്ലാ സാങ്കേതികവിദ്യകളും ഉപയോഗിച്ച് ശുദ്ധവും പുനരുപയോഗി ക്കാവുന്നതുമായ ഊർജസ്രോതസ്സുകളെ വർധിപ്പിക്കുന്നതിനുള്ള പദ്ധതികൾ തുടരുമെന്നും അദ്ദേഹം വ്യക്തമാക്കി.
No Comments
Leave a Comment