ദുബൈയിൽ ചുവപ്പ് സിഗ്നൽ ലംഘനം; പിടിച്ചെടുത്തത് 855 വാഹനങ്ങൾ
September 8, 2023
റെഡ് സിഗ്നൽ മറികടന്നതു മൂലം ദുബൈ എമിറേറ്റിൽ 51 അപകടങ്ങളാണ് കഴിഞ്ഞ ഏഴു മാസത്തിൽ ഉണ്ടായത്. അപകടങ്ങളിൽ രണ്ടു പേർ മരിക്കുകയും 73 പേർക്ക് പരിക്കേൽക്കുകയും ചെയ്തു. റെഡ് സിഗ്നൽ ലംഘിച്ചാൽ കടുത്ത നടപടി ഉറപ്പാണെന്ന് ദുബൈ പൊലീസ് മുന്നറിയിപ്പ് നൽകി.ഏറ്റവും അപകടകരമായ ട്രാഫിക് നിയമ ലംഘനമാണ് റെഡ്സിഗ്നൽ മറികടക്കൽ. മരണത്തിനും ഗുരുതരമായ പരിക്കുകൾക്കും കാണമാകുന്ന നിയമ ലംഘനമാണിതെന്ന് ദുബൈ പൊലീസ് പ്രസ്താവനയിൽവ്യക്തമാക്കി. ചുവപ്പ് സിഗ്നൽ മറികടന്നതിന് 855വാഹനങ്ങളാണ് പിന്നിട്ട ഏഴു മാസത്തിനിടെ പിടിച്ചെടുത്തത്. മൊത്തം 13,876 നിയമ ലംഘനങ്ങളാണ് ചുവപ്പ് സിഗ്നൽ ലംഘനത്തിന്‍റെ പേരിൽ രജിസ്റ്റർ ചെയ്തത്.മഞ്ഞ സിഗ്നൽ തെളിയുന്ന സമയത്ത് വേഗതകൂട്ടി കടന്നുപോകാൻ തുനിയുന്നതാണ് അപകടങ്ങൾക്ക് കാരണമാകുന്നത്. ജങ്ഷനുകളിൽ എത്തുമ്പോൾ വേഗത കുറച്ച്ജാഗ്രത പാലിക്കണമെന്ന നിയമം പലരും ശ്രദ്ധിക്കുന്നില്ലെന്നും പൊലീസ് വൃത്തങ്ങൾ ചൂണ്ടിക്കാട്ടി. യു.എ.ഇ ഫെഡറൽ നിയമമനുസരിച്ച് ചുവപ്പ് സിഗ്നൽ ലംഘിച്ചാൽ 1000ദിർഹം പിഴയും 12 ബ്ലാക് പോയിന്റുമാണ് ശിക്ഷ. ഇതിനു പുറമെ 30 ദിവസം വാഹനം കണ്ടു കെട്ടുകയും ചെയ്യും. ദുബൈ എമിറേറ്റിലെ പ്രത്യേക നിയമപ്രകാരം 50,000ദിർഹം പിഴയും 23ബ്ലാക് പോയിന്‍റുകളും വരെ ശിക്ഷ ലഭിക്കാനും വകുപ്പുണ്ട്. റോഡ് യാത്രികരുടെ സുരക്ഷയ്ക്കും മികച്ച ട്രാഫിക് സംവിധാനം ഉറപ്പുവരുത്തുന്നതിനും ദുബൈ പൊലീസ് എല്ലാ പരിശ്രമങ്ങളും നടത്തുന്നുണ്ടെന്ന് ട്രാഫിക്വിഭാഗം ഡയറക്ടർ മേജർ ജനറൽ സൈഫ്മുഹൈർ അൽ മസ്റൂയി പറഞ്ഞു.
No Comments
Leave a Comment
