ഓപ്പറേഷൻ ‘ഡെസേർട്ട് ലൈറ്റ്’: അറസ്റ്റിലായത് വൻ മയക്കുമരുന്ന് സംഘം
November 29, 2022
യു.എ.ഇ. ഉൾപ്പടെ ആറോളം രാജ്യങ്ങളിൽ നടത്തിയ അന്വേഷ ണത്തിൽ മയക്കുമരുന്ന് മാഫിയ തലവന്മാരുൾപ്പടെ 49 പേർ അറസ്റ്റിലായി. ഇതിൽ ആറുപേരെ യു.എ.ഇ.യിൽനിന്നാണ് അറസ്റ്റുചെയ്തത്. സ്പെയിൻ, ബെൽജിയം, നെതർലൻഡ്സ്, ഫ്രാൻസ്, അമേരിക്ക എന്നീ രാജ്യങ്ങൾക്കൊപ്പമാണ് യു.എ.ഇ.യും സംയുക്ത അന്വേഷണം നടത്തിയത്. രാജ്യത്തെ പ്രതിനിധീകരിച്ച് ദുബായ് പോലീസാണ് അന്വേഷണത്തിൽ പങ്കെടുത്തത്.ഉദ്യോഗസ്ഥർ നടത്തിയ ഇടപെടലിനെ യു.എ.ഇ. ആഭ്യന്തരമന്ത്രിയും ഉപപ്രധാനമന്ത്രിയുമായ ലെഫ്റ്റനന്റ് ജനറൽ ശൈഖ് സെയ്ഫ് ബിൻ സായിദ് അൽ നഹ്യാൻ അഭിനന്ദിച്ചു. മയക്കുമരുന്ന് വ്യാപാരത്തിന്റെ ഭൂരിഭാഗവും നിയന്ത്രിക്കുന്ന യൂറോപ്യൻസംഘത്തെയാണ് യൂറോ പോളിന്റെ സഹായത്തോടെ സംയുക്ത ഓപ്പറേഷനിലൂടെ പിടികൂടാനായത്. ഈ മാസം എട്ടിനും 19-നും ഇടയിലായിരുന്നു ‘ഡെസേർട്ട് ലൈറ്റ്’ എന്നുപേരിട്ട സംയുക്ത ഓപ്പറേഷനിലൂടെ യൂറോപ്പിലെ ഏറ്റവുംവലിയ ലഹരിക്കടത്ത് സംഘം അറസ്റ്റിലായത്.യൂറോപ്പിലെ കൊക്കെയ്ൻ വ്യാപാരത്തിന്റെ മൂന്നിലൊന്ന് വിപണി നിയന്ത്രിച്ചിരുന്ന ഇവരുടെ പക്കൽനിന്നും 30 ടണ്ണിലേറെ ലഹരിവസ്തുക്കൾ പോലീസ് പിടികൂടിയിട്ടുണ്ട്. മയക്കുമരുന്നിന് പുറമേ കള്ളപ്പണം വെളുപ്പിക്കൽ പ്രവർത്തനങ്ങൾക്കും സംഘം നേതൃത്വംനൽകിയതായി പോലീസ് അന്വേഷണത്തിൽ തെളിഞ്ഞിരുന്നു. കള്ളപ്പണം വെളുപ്പിക്കൽ തടയുന്നതിനും ലഹരിമാഫിയകളെ ഉന്മൂലനംചെയ്യുന്നതിനും യു.എ.ഇ.നടത്തുന്ന ശ്രമങ്ങളുടെ തെളിവാണ് ഓപ്പറേഷൻ ഡെസേർട്ട് ലൈറ്റെന്ന് പോലീസ് കമാൻഡർ ഇൻ ചീഫ് ലെഫ്റ്റനന്റ് ജനറൽ ഖലീഫ അൽ മർറി പറഞ്ഞു.
No Comments
Leave a Comment