ഉഭയകക്ഷിബന്ധം, ആഗോളവിഷയം : കൂടിയാലോചന നടത്തി യു.എ.ഇ.-ഇന്ത്യ
November 23, 2022
ഉഭയകക്ഷിബന്ധം ശക്തിപ്പെടുത്തുക, ആഗോളവിഷയങ്ങളിൽ കൂടിയാലോചന നടത്തുക എന്നിവ ലക്ഷ്യമിട്ട് യു.എ.ഇ. വിദേശകാര്യ അന്താരാഷ്ട്ര സഹകരണ മന്ത്രി ശൈഖ് അബ്ദുല്ല ബിൻ സായിദ് അൽ നഹ്യാൻ ഇന്ത്യ സന്ദർശിച്ചു.രണ്ടു ദിവസത്തെ ഔദ്യോഗിക സന്ദർശനത്തിനായി തിങ്കളാഴ്ച ഇന്ത്യയിലെത്തിയ അദ്ദേഹം ഇന്ത്യൻ വിദേശകാര്യ മന്ത്രി ഡോ.എസ്. ജയശങ്കറുമായി കൂടിക്കാഴ്ച നടത്തി. ശൈഖ് അബ്ദുല്ലയെ രാജ്യത്തേക്ക് സ്വാഗതം ചെയ്യുന്നതിൽ സന്തോഷമുണ്ടെന്നും അദ്ദേഹവുമായി ഈ വർഷത്തെ നാലാമത്തെ കൂടികാഴ്ചയാണിതെന്നും ഡോ. ജയശങ്കർ പറഞ്ഞു. വ്യാപാരം, നിക്ഷേപം, കോൺസുലേറ്റുമായി ബന്ധപ്പെട്ട കാര്യങ്ങൾ, വിദ്യാഭ്യാസം, ഭക്ഷ്യസുരക്ഷ തുടങ്ങിയ കാര്യങ്ങളിലെ പുരോഗതി കൂടിക്കാഴ്ചയിൽ അവലോകനം ചെയ്തു. യു.എ.ഇ. ഉന്നതതല പ്രതിനിധി സംഘം ശൈഖ് അബ്ദുല്ലയെ അനുഗമിച്ചു. സ്വതന്ത്ര പങ്കാളിത്ത കരാറിൽ (സെപ) ഒപ്പുവച്ചതിനുശേഷം രാജ്യങ്ങൾ തമ്മിലുള്ള അന്താരാഷ്ട്ര സഹകരണം വർധിച്ചുകൊണ്ടിരിക്കുകയാണ്.14 -ാമത് ജോയന്റ് കമ്മിഷൻ യോഗത്തിൽ പങ്കെടുക്കാനും ശൈഖ് അബ്ദുല്ലയുമായി കൂടിക്കാഴ്ച നടത്താനുമായി ഡോ. ജയശങ്കർ കഴിഞ്ഞ ആഗസ്റ്റിൽ യു.എ.ഇ. യിലെത്തിയിരുന്നു. കൂടാതെ കഴിഞ്ഞ ജൂൺ 28 ന് യു.എ.ഇ.യിലെത്തിയ ഇന്ത്യൻ പ്രധാനമന്ത്രി നരേന്ദ്രമോദി യു.എ.ഇ. പ്രസിഡന്റ് ശൈഖ് മുഹമ്മദ് ബിൻ സായിദ് അൽ നഹ്യാനുമായും കൂടിക്കാഴ്ച നടത്തിയിരുന്നു.
No Comments
Leave a Comment
