ഇന്ത്യയിലെ ഫുഡ്പാർക്കുകളിൽ യു.എ.ഇ 16,000 കോടി രൂപ നിക്ഷേപിക്കും
July 15, 2022
ഇന്ത്യയിൽ ആരംഭിക്കാനിരിക്കുന്ന ഫുഡ്പാർക്കുകളിൽ 200 കോടി ഡോളർ നിക്ഷേപിക്കുമെന്ന യു.എ.ഇ തീരുമാനം പ്രതീക്ഷാനിർഭാരമെന്ന് വ്യവസായലോകം. ഇന്നലെ യു.എ.ഇ.ക്ക് പുറമെ ഇന്ത്യ, യു.എസ്., ഇസ്രയേൽ എന്നീ രാജ്യങ്ങളുടെ പ്രതിനിധികൾ പങ്കെടുത്ത ഓൺലൈൻ ഉച്ചകോടിക്കുശേഷമായിരുന്നു പ്രഖ്യാപനം.തെക്കുകിഴക്കൻ ഏഷ്യയിലും ഗൾഫ് മേഖലയിലും ഭക്ഷ്യസുരക്ഷ ഉറപ്പാക്കുന്നതിന്റെ ഭാഗമായാണ് ഇന്ത്യയിലെ കാർഷിക ഭക്ഷ്യപാർക്കുകളിൽ നിക്ഷേപമിറക്കുന്നത്. ഇതോടൊപ്പം പാരമ്പര്യേതര ഊർജപദ്ധതികൾ വികസിപ്പിക്കുമെന്നും യു.എ.ഇ. അറിയിച്ചു. അമേരിക്കൻ പ്രസിഡന്റ് ജോ ബൈഡന്റെ ഇസ്രയേൽ സന്ദർശനത്തിന്റെ ആദ്യദിവസമായിരുന്നു ഓൺലൈൻ കൂടിക്കാഴ്ച.
യു.എ.ഇ. പ്രസിഡന്റ് ശൈഖ് മുഹമ്മദ് ബിൻ സായിദ് അൽ നഹ്യാൻ, ഇസ്രയേൽ പ്രധാനമന്ത്രി യാർ ലാപിഡ്, ഇന്ത്യൻ പ്രധാനമന്ത്രി നരേന്ദ്രമോദി എന്നിവരും കൂടിക്കാഴ്ചയിലുണ്ടായിരുന്നു.ഭക്ഷ്യസുരക്ഷ, സുസ്ഥിര ഭക്ഷ്യസംവിധാനങ്ങൾ എന്നിവ മെച്ചപ്പെടുത്താനുള്ള നൂതനവും ശാസ്ത്രാധിഷ്ഠിതവുമായ മാർഗങ്ങൾ തേടുന്നതിന്റെ ഭാഗമാണ് ഫുഡ്പാർക്കുകളെന്ന് നേതാക്കൾ സംയുക്തപ്രസ്താവനയിൽ പറഞ്ഞു. ഇന്ത്യയിലുടനീളമുള്ള സംയോജിത ഫുഡ്പാർക്കുകളിൽ അത്യാധുനിക സാങ്കേതികവിദ്യകളും വൈദഗ്ധ്യവും ഇസ്രയേലും യു.എസും കൊണ്ടുവരും. നാല് രാജ്യങ്ങളിൽനിന്നുള്ള നേതാക്കളുടെ ആദ്യ ഓൺലൈൻ യോഗമായിരുന്നു വ്യാഴാഴ്ച ചേർന്നത്.
No Comments
Leave a Comment
