അപകടങ്ങളില്ലാത്ത വേനൽക്കാലം: സുരക്ഷാപ്രചാരണം തുടങ്ങി
August 2, 2022
യു.എ.ഇ.യിൽ വാഹനാപകടങ്ങൾ കുറയ്ക്കാൻ ഗുണമേന്മയുള്ള ടയറുകൾ ഉപയോഗിക്കാനായി ജനങ്ങളെ ബോധവത്കരിക്കാൻ ആഭ്യന്തരമന്ത്രാലയം സുരക്ഷാപ്രചാരണം ആരംഭിച്ചു.ചൂടുകാലത്ത് സംഭവിക്കുന്ന അപകടങ്ങൾക്ക് പ്രധാനകാരണം വാഹനങ്ങളുടെ ടയറുകളുടെ പ്രശ്നമായതിനാലാണ് ബോധവത്കരണം ആരംഭിച്ചത്. ഓഗസ്റ്റ് ഒന്നുമുതൽ സെപ്റ്റംബർ ഒന്നുവരെയാണ് സുരക്ഷാപ്രചാരണം. ആഭ്യന്തരമന്ത്രാലയത്തിലെ ജനറൽ ഡിപ്പാർട്ട്മെന്റ് ഓഫ് ട്രാഫിക് കോ-ഓർഡിനേഷൻ രാജ്യത്തുടനീളമുള്ള പ്രാദേശിക ട്രാഫിക്, പട്രോൾ വകുപ്പുകളുമായി സഹകരിച്ചാണ് ബോധവത്കരണപ്രചാരണം. റോഡുകളിൽ സുരക്ഷ മെച്ചപ്പെടുത്തുന്നതിനായി ‘അപകടങ്ങളില്ലാത്ത വേനൽക്കാലം’ എന്ന പ്രമേയത്തിലാണ് പ്രചാരണം ആരംഭിച്ചത്.കഴിഞ്ഞവർഷം യു.എ.ഇ.യിൽ ചൂടുകാലത്ത് ടയറുമായി ബന്ധപ്പെട്ട അപകടങ്ങളിൽ 81 പേർ മരിക്കുകയും 943 പേർക്ക് പരിക്കേൽക്കുകയും ചെയ്തിട്ടുണ്ട്. യോഗ്യമല്ലാത്ത ടയറുകൾ ഉപയോഗിച്ച് വാഹനമോടിക്കുന്നതിന്റെ അപകടങ്ങളെക്കുറിച്ച് ജനങ്ങളെ ബോധവത്കരിക്കുകയാണ് പ്രധാനലക്ഷ്യം. റോഡപകടങ്ങൾ കാരണമുണ്ടാവുന്ന ദുരന്തങ്ങൾ ജനങ്ങളെ അറിയിക്കുകയും ബോധവത്കരിക്കുകയും അതുവഴി ഉയർന്ന റോഡ് സുരക്ഷ ഉറപ്പാക്കുകയും ചെയ്യും.ഉയർന്ന താപനില കണക്കിലെടുത്ത് ടയറുകളുടെ പ്രവർത്തനക്ഷമത കൃത്യമായി പരിശോധിക്കണമെന്ന് അധികൃതർ ഓർമിപ്പിച്ചു . പഴയ ടയറുകൾ, വായുസമ്മർദം കുറഞ്ഞത്, സ്ഥിരമായി അമിതഭാരം വഹിക്കുന്ന വാഹനങ്ങളുടെ ടയറുകൾ എന്നിവ ചൂടുകാലത്ത് അപകടങ്ങൾക്ക് കാരണമാവുമെന്ന് ഫെഡറൽ ട്രാഫിക് കൗൺസിൽ ചെയർമാൻ മേജർ ജനറൽ കൗൺസിൽ എൻജിനിയർ മുഹമ്മദ് സൈഫ് അൽ സഫിൻ പറഞ്ഞു. അപകടങ്ങൾ ഒഴിവാക്കാൻ ഗുണമേന്മയുള്ള ടയറുകൾ മാത്രം ഉപയോഗിക്കണമെന്ന് അദ്ദേഹം ഡ്രൈവർമാർക്ക് നിർദേശം നൽകി.
No Comments
Leave a Comment