അടിയന്തര പാസ്പോർട്ട് പുതുക്കലിന് ദുബായിലെ ഇന്ത്യൻ പ്രവാസികൾക്ക് ‘തത്കാൽ’ വഴി അപേക്ഷിക്കാം
June 10, 2022
അടിയന്തര പാസ്പോർട്ട് പുതുക്കലിന് ദുബായിലുള്ള ഇന്ത്യൻ പ്രവാസികൾക്ക് ഇനി ‘തത്കാൽ’ സേവനത്തിന് കീഴിൽ അപേക്ഷിക്കാമെന്ന് യുഎഇയിലെ ഇന്ത്യൻ സ്ഥാനപതി സഞ്ജയ് സുധീർ പറഞ്ഞു. പാസ്പോർട്ട് പുതുക്കുന്നതിനുള്ള വൻ തിരക്ക് നേരിടാൻ ദുബായിലെ ഇന്ത്യൻ കോൺസുലേറ്റ് നടത്തിയ പ്രത്യേക വോക്ക് ഇൻ ക്യാംപുകളെ തുടർന്നാണ് നടപടി. ‘തത്കാൽ’ അപേക്ഷകൾ വഴിയുള്ള പാസ്പോർട്ടുകൾ ഡെലിവറിക്കായി തിരഞ്ഞെടുത്ത ഓപ്ഷനെ ആശ്രയിച്ച് ഒരു ദിവസത്തിനുള്ളിൽ നടപടികൾ പൂർത്തിയാക്കി നേരിട്ടോ കൊറിയർ വഴിയോ ഡെലിവറി ചെയ്യും. പൊലീസ് വെരിഫിക്കേഷൻ നടത്തിയവരുടെ യോഗ്യരായ അപേക്ഷകൾ മാത്രമേ ‘തത്കാൽ’ വിഭാഗത്തിന് കീഴിൽ അനുവദിക്കൂ. അടിയന്തര യാത്രാ ആവശ്യകതകൾ, പ്രത്യേകിച്ച് മെഡിക്കൽ അത്യാഹിതങ്ങളോ, കുടുംബത്തിലെ മരണം എന്നിവയോ കാരണം അപേക്ഷ പരിഗണിക്കും. മുതിർന്ന പൗരന്മാരുടെയും നവജാതശിശുക്കളുടെയും പാസ്പോർട്ട് അപേക്ഷകളിന്മേൽ സാധാരണ സാഹചര്യങ്ങളിൽ പോലും നടപടികൾ പൂർത്തിയാക്കുന്നതിന് അപോയിന്റ്മെന്റ് ആവശ്യമില്ല. നടപടിക്രമങ്ങൾ കാര്യക്ഷമമാക്കാനും കാലതാമസം ഒഴിവാക്കാനും കോൺസുലേറ്റ് പരമാവധി ശ്രമിച്ചിട്ടുണ്ടെന്ന് സ്ഥാനപതി പറഞ്ഞു. പാസ്പോർട്ട് സേവനങ്ങൾക്കായുള്ള അപോയിന്റ്മെന്റ് കാത്തിരിപ്പ് കാലാവധി ഇപ്പോൾ ഒരാഴ്ചയായി കുറഞ്ഞിട്ടുണ്ടെന്നും കൂട്ടിച്ചേർത്തു.
No Comments
Leave a Comment